〈高美燈塔个心肚話〉 徐熏娸
本篇作品出自《第七屆台中文學獎得獎作品集，母語詩類客語組，佳作》
風聲四起 麼儕人
掀起該面海簾
恐怕係
毋擔輸贏 東偷西撮个日朔
囥入你个領域
偷躡你一生人引領航向个輝煌歷史
無成係
毋堪思量 浪花四散坪个海洋
目赤你个功勞
沖刷你紅白相間風吹日炙个謙身
你講 無相干
本本愛企在這位所
敢生敢死 寸步不離
掌等 高美溼地
望等 烏水溝
守等 一垤疆土
你講 該古老个風 還係遊遊野野
無落無著 風神碌碌 溜溜竄
你講 該後生个雲 還係蹍腳毋歇
無抵無擋 浮雲哎哎 犖犖過
你講 風雲本無物 物本如風雲
奈位正係 風摎雲个國界
想必係
踏心為界
界在安然
*本節目由文化部贊助播出
