〈駛轉1959〉何卿爾
本篇作品出自《第十屆臺中文學獎 客語詩類首獎》
歲月个衫袋底肚跌出一張
老車票
四四角角个車票係佢憨直个性體
舊黃舊黃个車票係佢耐過風霜个面容
中央鑿一個圓圓个空係分遊子出外時
回望故鄉个眼
相尖相矻个人,火車愛開咧
該係盡尾枋
坐上東勢站个火車,駛轉
樟樹林青里里个樹影,胠過
大甲河,駛轉
涼沁沁个竹圍風,行過
梅樹下,駛轉
羊妹妹个十八歲,溜到
石岡,駛轉
客家八音牽聲个田舍,直直到
朴口,駛轉
靚靚个禾田,駛轉……
啊! 㧡擔个,落車咧
讀書个,落車咧
尋老鄰舍个,落車咧
載貨个,落車咧
載大樹材个,落車咧
盡尾,火車
乜落車咧
伸著一細片,圓圓个紙屑
剪票鉗項跌落來个,還停在票亭
等遊子,尋轉該年
跌在故鄉个
心
(本節目由文化部贊助播出)
更多新聞: 未成年違停亂象!場景如「世界末日」網見照片全歪樓:薩諾斯彈指了?