〈在山里對岸想汝〉
本篇作品出自《記得你的好》
遠方的山里比日頭早
彎彎斡斡个山路將鬧熱掰開
還係阻擋不了仰慕者个造訪
在該燈火從來毋識噩夜个所在
毋使趕路个火車正會停下來
層層个山措等夢想摎愛情
在對岸遙望
長長个火車路帶等清風
講等毋識停下來个愛情故事
企在月台項
等待載轉心上人个車枋
就像遙想天邊个星斗
卑南大溪在眼前打橫過
食中央山脈个奶汁
接海岸山脈个汗水
闊野野个大河壩 緊滾緊闊
普悠瑪勇士走到比弓箭還較遽
手一伸
窩湖水就直洩入海
英雄的手尾力削開崩崗石壁
將一條銀帶拉向太平洋
山當近 海當近 人乜當近
近到聽得著 (人恩)俚个心跳摎夢想
卑南溪唱等思戀歌
再多个河霸石乜擋毋核
在山里个對岸想你
（本節目由文化部贊助播出）
更多新聞： 台中公車站牌成留言版？ 女隨意塗鴉不雅文字"語意邏輯看攏嘸"
